العودة   منتديات انا لوزا | aNaLoZa > منتديات عالم المرأة > عالم المرأة - منتدى المواضيع النسائية العامه

عالم المرأة - منتدى المواضيع النسائية العامه قسم مخصص للموضوعات النسائية العامه ومناقشة قضايا المرأة العربية


1 
Salah Hamouda


فوائد ارتداء الحجاب - علشان كده أنا محجبة

فوائد ارتداء الحجاب علشان محجبة


أنا محجبة واخترت الحجاب طواعية بعد إيماني اولا واخيرا بأمر ربنا بأن الحجاب فرض على كل مسلمة وإلي جانب الطاعة والامتثال لامر الله سبحانه وتعالي فهناك الأسباب التالية:


1 - علشان انا حرة.. مش من حق حد يشوف مني اللي مش عاوزاه يشوفه إلا بإرادتي.. ومن حقي أن امنع أي احد أن يشوف مني أجمل ما عندي.الا زوجي واللي من حقه يشوف ده ويبقى حقه وحلاله بلاله عن طيب خاطر.. لازم زوجي هو كمان يديني مشاعره واللي باقي من عمره عن طيب خاطر.

2 - علشان أنا غالية.. مينفعش أقلل من قيمة نفسي واخليها عرضة لكل العيون لتنهشها .. ويبقى خروجي مكشوفة ضوء أخضر لكل من هب ودب يسرق مني ولو نظرة لأي جزء مش متغطي مني.. حتى لو مكنش ده قصدي.. بس مش حقدر امنعه.. كامل اعتذاري لغير المحجبات..

ولكن ده اللي حيوصل منك لضعيفي النفوس حتى لو مكنش ده قصدك.. وده اللي علشانه ربنا فرض الحجاب . علشان ميطمعش فيكي الذي في قلبه مرض.. مع الأخذ في الاعتبار انه “كل من هب ودب ده” مش بس الشباب اللي بيعاكس البنات في الشارع.. ده يتضمن حتي الزبال اللي بيسوق عربية الزبالة في الشارع.. كل دول بقى من الممكن انهم يبصوا لي.. واشيل انا وزر نظراتهم تلك .

3 - علشان أنا باحترم نفسي.. وشايفة نفسي كبيرة قدام نفسي.. ومينفعش أنزل سوق المنافسة في الأنوثة علشان أفوز في الآخر بنظرة شهوانية أو كلمة غزل رخيصة أو عرض صداقة وصحوبية لاترضي الله ورسوله صلي الله عليه وسلم .

-4 - علشان انا جمالي مش خارجي وبس.. ومن حقي ان اللي ييجي يتجوزني.. واللي حاديله الباقي من عمري.. واللي حديله كل مشاعري.. واللي حاقاسمه أحلامي وأفكاري.. واللي حخلف منه ولادي.. وح اربيهم معاه.. مايختارنيش على مقاييس شكلية وبس.. أو تبقى هي دي العامل الأساسي في أختياره ليا.. علشان كدة مش ضروري يشوفني في كامل زينتي وجمالي قبل ما يتجوزني.. الأهم انه يحب روحي ويعجب بشخصيتي

ويرتاح معايا نفسياً.. أصل في بنات بتأجل الحجاب لحد ما تتجوز.. على أساس انها تكون شنكلت واحد وضمنته.. مع إن مفيش حاجة مضمونة في الزمن ده.. واللي اختارها علشان جمالها.. ممكن قوي يتجوز عليها واحدة أجمل منها.. لأنه أكيد في هناك الأجمل منها.

5 - علشان أنا باخاف على أخويا في الله اللي بيشوفني في الشغل أو في الكلية أو في المواصلات أو في الشارع.. ويمكن يكون عاوز يقرب من ربنا.. وبيجاهد نفسه علشان يغض بصره.. فمرضاش لنفسي اني اكون سبب في اني افتنه في دينه .

6 - علشان أنا باشيل هم أخويا في الله اللي نفسه يتجوز ومش قادر لضعف إمكانياته المادية.. فمش ضروري يعني ازود عليه همومه.. وأخيِلُه في الرايحة والجاية ينبهر بجمالي وزينتي المكشوفة .

7 - ده غير حاجة مهمة كمان.. الكفن بتاع النساء.. فيه حجاب.. فاللي مش حتلبسه وهي حية بإرادتها طاعة لله.. حتلبسه كدة كدة وهي رايحة قبرها.. وطالما ربنا بيقول اننا نتستر حتى واحنا رايحين قبورنا وخلاص انتهى التكليف.. ومحدش حيشوفنا تاني ولا حد حيطمع فينا.. يبقى مفيش معنى اننا نمشي مكشوفين لكل العيون واحنا أحياء نرزق.. يبقى الأولى اطيع ربنا بإرادتي وأقابله وهو راضي عني وآخد أجري كاملا.. ولاّ اني ملبسوش غير وانا جثة واقابل ربنا وهو غضبان عليا.


الأسباب اللي قلتها فوق دي.. هي اللي فهمتني ليه ربنا فرض علي بنات حواء الحجاب.. مش تعسير ولا تضييق.. الحجاب فعلا عزة وكرامة.. ميعرفهاش غير اللي ذاق طعم الستر.






الكلمات الدلالية
علشان كده أنا محجبة, فوائد ارتداء الحجاب

أدوات الموضوع
انواع عرض الموضوع

مواضيع ذات صلة مع فوائد ارتداء الحجاب - علشان كده أنا محجبة
النصائح العشرة للبنات علشان متضفضحش من قسم عالم المرأة - منتدى المواضيع النسائية العامه
الابعاد التاريخيه لمعركة الحجاب والسفور فى المجتمعات الاسلاميه الحجاب الإسلامي من قسم بيت الطلبة والطالبات - المنتدى التعليمى
بحث عن الحجاب والمرأة - بحث علمى عن الحجاب والمرأة كامل بالتنسيق بصيغة word من قسم بيت الطلبة والطالبات - المنتدى التعليمى
بحث عن الحجاب الإسلامي - بحث علمى عن الحجاب الإسلامي كامل بالتنسيق بصيغة word من قسم بيت الطلبة والطالبات - المنتدى التعليمى
خطوره ارتداء الملابس الضيقة في فترات المراهقة من قسم الطب البديل - صحة المرأة - العلاج بالأعشاب والنباتات

الساعة الآن 03:53 AM.



Powered by vBulletin® Copyright ©2000 - 2014, Jelsoft Enterprises Ltd.
المواد المنشورة بمنتديات انا لوزا لا تعبر عن سياسة ورأى إدارة الموقع ولكنها تعبر عن وجهة نظر كاتبها فقط